El sono in questa cità et anche ala zornada per la grandeza et bontà soa concorre homeni da diverse bande et actutissimi ingegni, apti ad excogitar et trovar varii ingegnosi artificii. S’el fosse provvisto, che le opere et artificii trovade da loro altri, viste che le havesseno, non podesseno farle e tuor l’honor suo, simel homeni exceritariano l’ingegno, troveriano et fariano de le chosse che sariano de non picola utilità et beneficio al stado nostro.
Però l’andarà parte che per auchtorità de questo Conseio, chadaun che farà in questa cità alcun nuovo et ingegnoso artificio, non facto paravanti nel dominio nostro, reducto che’l sarà a perfection, siché el se possi usar et excercitar, sia tegnudo darlo in nota al officio di nostri provededori de Comun, siando proibito a chadaun altro in alguna terra e luogo nostro, far algun altro artificio, ad imagine et similitudine de quello, senza consentimento et licentia del auctor fino ad anni x. Et tamen se algun el fesse, l’auctor et inventor predicto, habia libertà poderlo citar a chadaun officio de questa cità, dal qual officio el dicto che havesse contrafacto sia astreto a pagarli ducati cento, et l’artificio subito sia desfacto. Siando però in libertà de la nostra signoria ad ogni suo piaxer tuor et usar nei suo bisogni chadaun in dicti artificii et in strumenti, cum questa però condition, che altri cha i auctori non li possi exercitar.